അണ്ടർ 23 വനിതാ ടി20 ചാമ്പ്യൻഷിപ്പ്; മഹാരാഷ്ട്രക്ക് മുന്നിൽ കേരളം വീണു

അണ്ടർ 23 വനിതാ ട്വന്റി 20 ദേശീയ ചാമ്പ്യൻഷിപ്പിൽ കേരളത്തിന് നിരാശാജനകമായ തോൽവി. എട്ട് വിക്കറ്റിനാണ് മഹാരാഷ്ട്ര കേരളത്തെ പരാജയപ്പെടുത്തിയത്. ആദ്യം ബാറ്റ് ചെയ്ത കേരളം നിശ്ചിത 20 ഓവറിൽ ഒൻപത് വിക്കറ്റ് നഷ്ടത്തിൽ 128 റൺസെടുത്തു. മറുപടി ബാറ്റിങ്ങിൽ മികച്ച പ്രകടനം കാഴ്ചവെച്ച മഹാരാഷ്ട്ര 17.2 ഓവറിൽ രണ്ട് വിക്കറ്റ് മാത്രം നഷ്ടപ്പെടുത്തി ലക്ഷ്യത്തിലെത്തി.

ടോസ് നേടി ബാറ്റിങ് തിരഞ്ഞെടുത്ത കേരളത്തിന് രണ്ടാം ഓവറിൽ തന്നെ ദിയ ഗിരീഷിന്റെ (4) വിക്കറ്റ് നഷ്ടമായി. എന്നാൽ അമീറ ബീഗവും ശ്രേയ സിജുവും ചേർന്ന് ഇന്നിങ്സ് മുന്നോട്ടുകൊണ്ടുപോയി. ആദ്യ ആറ് ഓവറുകൾ പിന്നിടുമ്പോൾ ഒരു വിക്കറ്റ് നഷ്ടത്തിൽ 54 റൺസെന്ന മികച്ച നിലയിലായിരുന്നു കേരളം.

എന്നാൽ ഏഴാം ഓവറിൽ ആചൽ അഗർവാൾ നടത്തിയ ബൗളിങ് കേരളത്തിന് കനത്ത തിരിച്ചടിയായി. ഓവറിലെ ആദ്യ പന്തിൽ 29 റൺസെടുത്ത അമീറ ബീഗം പുറത്തായതിനു പിന്നാലെ അനന്യ പ്രദീപും നജ്ല നൗഷാദും റൺസൊന്നും നേടാതെ മടങ്ങി. ഇതോടെ കേരളത്തിന്റെ ബാറ്റിങ് താളം തെറ്റി.

അഞ്ചാം വിക്കറ്റിൽ ശ്രേയ സിജുവും ക്യാപ്റ്റൻ വി.ജെ. ജോഷിതയും ചേർന്ന് 52 റൺസ് കൂട്ടിച്ചേർത്തത് കേരളത്തിന് ആശ്വാസമായി. ശ്രേയ 41 റൺസും ജോഷിത 34 റൺസും നേടി. എന്നാൽ അവസാന ഓവറുകളിൽ മറ്റ് ബാറ്റർമാർക്ക് കാര്യമായ സംഭാവന നൽകാനാകാതെ പോയതോടെ കേരളത്തിന്റെ സ്കോർ 128ൽ ഒതുങ്ങി. മഹാരാഷ്ട്രക്കായി ആചൽ അഗർവാളും രോഷ്ണി പർദ്ദിയും മൂന്ന് വിക്കറ്റ് വീതം വീഴ്ത്തി. ശ്വേത സാവന്ത് രണ്ട് വിക്കറ്റും സ്വന്തമാക്കി.

129 റൺസ് വിജയലക്ഷ്യവുമായി ഇറങ്ങിയ മഹാരാഷ്ട്ര തുടക്കം മുതൽ ആക്രമണാത്മക ബാറ്റിങ്ങാണ് പുറത്തെടുത്തത്. ഓപ്പണർമാരായ ദ്യനന്ദ നികവും ഈശ്വരി സവാക്കറും ചേർന്ന് കേരള ബൗളർമാർക്ക് അവസരം നൽകാതെ റൺസ് കണ്ടെത്തി. ദ്യനന്ദ 32 പന്തിൽ 53 റൺസ് നേടിയപ്പോൾ ഈശ്വരി 53 പന്തിൽ പുറത്താകാതെ 59 റൺസുമായി ടീമിന്റെ വിജയത്തിൽ നിർണായക പങ്കുവഹിച്ചു.

16 പന്തുകൾ ശേഷിക്കെ രണ്ട് വിക്കറ്റ് മാത്രം നഷ്ടപ്പെടുത്തി മഹാരാഷ്ട്ര വിജയം സ്വന്തമാക്കി. കേരളത്തിനായി നജ്ല നൗഷാദും നിയ നസ്‌നീനും ഓരോ വിക്കറ്റ് വീതം നേടി. ബാറ്റിങ്ങിലും ബൗളിങ്ങിലും ഒരുപോലെ ആധിപത്യം പുലർത്തിയ മഹാരാഷ്ട്രക്ക് മുന്നിൽ കേരളത്തിന് പിടിച്ചുനിൽക്കാനായില്ല.

Leave a Comment

Your email address will not be published. Required fields are marked *

Scroll to Top