ബാസിത്തിന്റെ പോരാട്ടം വിഫലം; ആന്ധ്രക്കെതിരെ കേരളത്തിന് 29 റൺസിന്റെ തോൽവി

സയ്യിദ് മുഷ്താഖ് അലി ട്രോഫി ടി20 ടൂർണമെന്റിൽ കേരളത്തിന് നിരാശാജനകമായ തോൽവി. ആവേശകരമായ പോരാട്ടത്തിൽ ആന്ധ്ര 29 റൺസിനാണ് കേരളത്തെ പരാജയപ്പെടുത്തിയത്. ആദ്യം ബാറ്റ് ചെയ്ത ആന്ധ്ര ഏഴ് വിക്കറ്റ് നഷ്ടത്തിൽ 225 റൺസെന്ന കൂറ്റൻ സ്കോർ പടുത്തുയർത്തി. മറുപടി ബാറ്റിങ്ങിനിറങ്ങിയ കേരളത്തിന് നിശ്ചിത 20 ഓവറിൽ അഞ്ച് വിക്കറ്റ് നഷ്ടത്തിൽ 196 റൺസെടുക്കാനേ സാധിച്ചുള്ളൂ. 35 പന്തിൽ പുറത്താകാതെ 70 റൺസ് നേടിയ അബ്ദുൾ ബാസിത്തിന്റെ വെടിക്കെട്ട് പ്രകടനം കേരളത്തിന്റെ വിജയത്തിന് മതിയായില്ല. ആന്ധ്രയുടെ എസ്.വി. രാഹുലാണ് മത്സരത്തിലെ താരം.

ടോസ് നേടി ബാറ്റിങ് തിരഞ്ഞെടുത്ത ആന്ധ്രക്ക് ഓപ്പണർമാരായ ഷെയ്ഖ് റഷീദും ഹേമന്ത് റെഡ്ഡിയും മികച്ച തുടക്കമാണ് നൽകിയത്. ഇരുവരും ചേർന്ന് 5.1 ഓവറിൽ 54 റൺസ് കൂട്ടിച്ചേർത്തു. ആറാം ഓവറിൽ ഹേമന്ത് റെഡ്ഡിയെയും പിന്നാലെ ക്രീസിലെത്തിയ ക്യാപ്റ്റൻ റിക്കി ഭുവിയെയും പുറത്താക്കി ബിജു നാരായണൻ കേരളത്തിന് പ്രതീക്ഷ നൽകി.

എന്നാൽ തുടർന്നെത്തിയ ഷെയ്ഖ് റഷീദും എസ്.വി. രാഹുലും ചേർന്ന് ആന്ധ്രയുടെ ഇന്നിങ്സ് മുന്നോട്ടുകൊണ്ടുപോയി. 42 പന്തിൽ 69 റൺസിന്റെ കൂട്ടുകെട്ടാണ് ഇരുവരും പടുത്തുയർത്തിയത്. 39 പന്തിൽ 60 റൺസെടുത്ത റഷീദിനെ അബ്ദുൾ ബാസിത്ത് പുറത്താക്കി. എന്നാൽ ആന്ധ്രയുടെ റൺവേട്ടയ്ക്ക് വേഗം കുറയ്ക്കാൻ കേരളത്തിന് കഴിഞ്ഞില്ല.

അഞ്ചാം വിക്കറ്റിൽ എസ്.വി. രാഹുലും അശ്വിൻ ഹെബ്ബാറും നടത്തിയ ആക്രമണമാണ് ആന്ധ്രയെ 225 റൺസിലെത്തിച്ചത്. വെറും 18 പന്തിൽ ഇരുവരും ചേർന്ന് 50 റൺസ് അടിച്ചുകൂട്ടി. 30 പന്തിൽ 64 റൺസുമായി രാഹുൽ തിളങ്ങിയപ്പോൾ അശ്വിൻ ഹെബ്ബാർ 15 പന്തിൽ 37 റൺസ് നേടി. അവസാന ഓവറുകളിൽ കെ. രാജുവും വെടിക്കെട്ട് ബാറ്റിങ് പുറത്തെടുത്തു. ഏഴ് പന്തിൽ 20 റൺസുമായി താരം പുറത്താകാതെ നിന്നു.

കേരളത്തിനായി എം.ഡി. നിധീഷ് മൂന്ന് വിക്കറ്റുകൾ വീഴ്ത്തിയപ്പോൾ ബിജു നാരായണൻ രണ്ടുപേരെ പുറത്താക്കി. എന്നാൽ ആന്ധ്രയുടെ ബാറ്റിങ് കരുത്തിന് മുന്നിൽ കേരള ബൗളർമാർക്ക് റൺഒഴുക്ക് നിയന്ത്രിക്കാനായില്ല. തുടർന്ന് 226 റൺസ് വിജയലക്ഷ്യം പിന്തുടർന്ന കേരളത്തിന് ബാസിത്തിന്റെ മികവിൽ പൊരുതാനായെങ്കിലും ലക്ഷ്യത്തിലെത്താനായില്ല.

Leave a Comment

Your email address will not be published. Required fields are marked *

Scroll to Top